Seventh Meering - Reaction Paper

Liberal Feminism at ang mga Challenging na Katanungan ni Ma’am

Habang hinihintay ang iba pang miyembro ng unang pangkat na siyang mag-uulat sa

araw na ito, ay natalakay ni Ma’am ang pagkakaiba ng women’s movement at feminist movement.

Bingyang-diin niya na ang una’y isang kilusan ng mga kababaihan na hindi naman payak na

ipinaglalaban ang mga bagay tungkol sa mga gender issues lamang, tulad ng Gabriela.

Samantalang ang ikalawa nama’y mas pokus ang kanilang ipinaglalaban sa pagkakaroon ng

gender equality sa ating lipunan. Sinabi niya rin na ang unang sosyal na konstruksiyon ng mga

tao ay ang kanyang seksuwal na konstruksiyon.

Nang talakayin na ang Liberal na Feminismo ay tila nahirapan ang mga tagapag-ulat nito

sa kadahilanang nahirapan talaga silang sagutin ang mga tanong at komento ni Ma’am. HIndi ko

naman sila masisisi sapagkat bilang isang mag-aaral na bago pa lang sa larangang ito, hindi

madaling unawain ang “wika” ni Alison Jaggar na siyang sumulat ng librong Feminist Politics

and Human Nature na siyang inirekomendang libro ni Ma’am sa amin. Sabi nga ni Ma’am,

upang matiyak na naunawaan mo ang iyong binasa, kailangang maipaliwanag mo ito gamit ang

iyong sariling salita at wika.

Kaya naman, ilan sa mahahalagang naunawaan ko sa paksa namin ngayon ay ang ugat ng

liberal na feminismo kung saan nabuo ito kasabay ng paglago ng kapitalismo sa mundo. Ito

umano ay nagnanais ng reporma sa politikal na sistemang umiiral noon. Nabanggit din ang

rationality kung saan upang masabing isa kang rasiyonal na tao, kailangang pasok ka sa mga

pamantayang ito: alam mo ang tama at mali, alam mo ang pagpili ng tamang pamamaraan upang

makuha ang mithiin, at ikaw ay nasa panig ng moral ayon sa batayan ng mga tao.

Isa pa sa mahalagang naitatak sa aking isipan ay kung ano nga ba ang ugat ng opresyon

ng mga kababaihan sa mundo, simple lang, ito ay walang iba kundi ang batas natin mismo. At

may dalawang klasipikasyon ang batas, una ay pormal na batas na gawa ng mga mambabatas, at

ikalawa ay hindi pormal na batas, ito ang naabutan mo nang batas na umiiral sa iyong lipunan, sa

araw-araw na pamumuhay ng mga tao. At paano nga ba mareresolba ang problemang opresyon

na ito sa mga kababaihan? Simple lang din, ireporma ang batas! Ireporma ito ng may

konsiderasyon sa mga kababaihan at labanan ang sexism o pagdomina ng mga kalalakihan sa

pamamagitan ng edukasyon.

Maaarin ngang tila napaka-simple lang pala kung pakakaisipin ang ugat ng problemang

ipinaglalaban ng feminismo ngunit sa realidad ng buhay, dahil nga isang matibay na institusyon

ang kinakalaban at pilit na nilalabanan natin, isang sistemang nagnanais din namang mapanatili

ang kanilang kontrol sa lipunan, hindi madaling maisakatuparan ang mabilisang pagbabagong

ito. Lalo na’t kung sa paggamit pa lamang ng edukasyon bilang daan sa abolisyon ng patriarkal

na sistema sa mundo ay limitado lamang ang nakakaranas ng pribilehiyong ito, hindi talaga

magiging madali ang paglaganap ng diwang ito ng feminismo.

Dagdag pa rito ay ang maling pananaw ng mga tao, at maging ng ibang mga kababaihan

mismo, sa kahulugan ng salitang feminismo. Ayon nga kay Ma’am Fernandez ay hindi naman

ito nangangahulugang kinamumuhian na natin ang mga kalalakihan. Bagkus, ang feminismo ay

naglalayong analisahin o suriin nang mabuti ang ating lipunan, ang kultura nito at mga ‘batas’

na naitatag nito. Kaya laking tuwa ko talaga at nabigyang pagkakataon talaga ako na mamulat sa

mapanlinlang na maskara ng ating lipunan, at magising sa mahimbing na agos ng walang malay

at walang pakialam na sambayanan.

Sixth Meeting - Reaction Paper

Sa Wakas, Ang Muling Pagkikita

Isang linggo rin ang lumipas na parang bula at nasayang dahil sa malakas na ulan noong

nakaraang Martes at pagkansela ng mga GE na klase para sa isang forum noong Huwebes. At sa

wakas, matapos ang isang linggong paghihintay ay nakapag-ulat na rin kaming ika-apat na

pangkat. Sa una ay natuwa kami sa mga naging pangyayari sapagkat nabigyan kami ng

pagkakataong makapaghanda ngunit kinalaunan ay tila kami lalong nato-torture sa napakakomplikadong

teorya ni Jaques Lacan, ang Linguistic Theory.

Ilan sa mga nakapaloob na ideya sa teoryang ito ay ang iba’t ibang yugto ng isang bata

tungo sa kanyang psychosexual development. Ang unang yugto ay mula 0-6 na buwan kung saan

sinasabing pinakamalapit ang isang tao sa the Real o ang natural na estado ng tao kung saan wala

pa itong bahid ng epekto ng mga wika, batas, kultura atbp. ng mundong kanyang ginagalawan.

Sunod naman ay mula 6-18 buwan at dito ay dumaraan ang bata sa mirror stage kung saan sa

umpisa ay makikila ng bata ang kanyang sarili at papasok siya sa Imaginary order o ideal self

kasabay ng epekto ng social order ng kanyang ginagalawan. Huling yugto ay mula 18 buwan

hanggang 4 na taon at dito ay natutunan na ng bata ang wika kaya papasok na ngayon ito sa

Symbolic order.

Kasabay ng mga ideyang ito ay ang paggamit ni Lacan ng mga komplikadong

Mathematical formulae bilang gabay sa pagpapaliwanag niya kung bakit - “there’s no such thing

as sexual relationship.” Sinasabing ang mga lalaki ay dumaranas ng castration o ang

pagsasakripisyo para tuluyang makapasok sa ninanais na societal order upang maging

matagumpay sa buhay. Samantalang ang mga babae naman ay hindi ganap ang epekto nito sa

kanila, sapagkat madalas ay hindi naman dumaranas ng Oedipus at Castration Complex.

Napakarami pang ipinaglalaban ng teoryang ito ni Lacan na hindi ko pa rin naman lubos

na maipaliwanag pero sa huli iisa lang ang sinasabi nito sa atin, na ang ang nagbubuo ng

kahulugan ay pagkakaiba o meaning comes form difference and absence. Mapapansin na sexist

kasi ang karamihan sa mga wika sa mundo epekto pa rin ng patriarkal na sistemang umiiral sa

atin. Kaya nga ang teoryang ito, naging daan man para sa panibagong konstruksiyong ng

pagkakaiba ng mga lalaki at babae ay binatikos ng maraming peminista dahil sa pagiging bias

nito sa mga kababaihan. Malalaman pa namin ang mga huling teoryang tatalakayin ng ikalimang

pangkat sa susunod na pagtitipon. Nawa’y lalo pang mapalawak ang aming pag-unawa sa

usaping ito ng sex at gender.

Fifth Meeting - Reaction Paper

Labanan ng mga Teorya Tungo sa Pag-unawa Natin sa Sekswalidad at Kasarian

                        Umpisa na naman ng isang mahabang talakayan ngayon ng mga pag-uulat ng bawat grupo ukol sa iba’t ibang teorya na nagbigay kontribusyon sa konstruksiyon ng sekswalidad at kasarian sa ating lipunan. Una na rito ay ang Penis Envy Theory ni Sigmund Freud kung saan tinalakay ang nagiging reaksiyon ng isang batang babae sa oras na mapagtanto niyang wala siyang penis at siya ay dadaan sa phallic stage sa edad tatlo hanggang lima kung saan sinisisi niya ang ‘kakulangan’ niyang ito sa kanyang ina, kaya ilalayo niya ang kanyang sarili dito at sa halip ay magiging malapit sa kanyang ama. Maaari namang magkaroon ng Oedipus Complex ang anak na lalaki kung saan sila ay magkakaroon ng atraksiyon sa kanilang ina. Ang katumbas naman nito ay ang Electra Complex na maaaring maranasan ng anak na babae kung saan ay itinuturing niyang role model ang kanyang ina. Ang teoryang ito ni Freud ay naging kontrobersiyal at umani ng kritisismo dahil sa patriarkal na pananaw nito at pahiwatig na ang mga babae ay inferior sa mga kalalakihan.

                        Kontra naman sa teoryang ito ni Freud ay ang Woman Envy Theory ni Karen Horney. Sinasabi naman ng teoryang ito na ang mga lalaki ang naiinggit sa kakayahan ng mga babaeng magdalang-tao kaya nakararamdam sila ng inferiority sa atin. At sa halip na sa ari ng mga lalaki tayo naiinggit, maaaring sa estado o status nila tayo mas naiinggit. 

                          Sunod naman ay ang Reproduction of Mothering Theory ni Nancy Chodorow. Tinalakay niya kung paanong naipapasa ang panlipunang papel ng isang pagiging ina sa kanyang anak sa paglipas ng mga henerasyon. Sinuri niya rin ang epekto ng tradisyong ito ng pag-aalaga ng isang ina sa pagkakakilanlan ng lalaki at babae, sa istruktura ng pamilya,  sekswal na relasyon, at ideolohiya tungkol sa mga kababaihan. Halimbawa nito ay kapag naturingang mama’s boy ang isang lalaki ay tila negatibo ang dating nito subalit kapag naturingang papa’s girl naman ang isang babae ay normal lang o positibo pa ang dating.

                        Mayroon pang dalawang teorya na hindi natalakay, ngunit sa tatlong iyan pa lang ay makikita na kung paanong naglalabanan ang iba’t ibang ideolohiya ng mga sikolohista, kung paanong kinokontra nila ang mga nauna na kasabay ng pagbabago ng lipunan sa paglipas ng panahon. Maaaring masasabi nating tila napakababaw o nakakatawa ang batayan ng ilang mga teoryang ito, tulad na lamang ng kay Freud para sa akin, ngunit kung pakakaisiping mabuti ay naging bahagi at nakatulong pa rin ito sa pagbubuo natin ng komplikadong kahulugan ng sekswalidad at kasarian. 

                       Malaki rin ang posibilidad na ang pagtanggap natin sa mga teoryang ito ay naaapektuhan ng ating kasarian at sariling pananaw sa buhay. Ang kultura rin natin dito sa ating bansa ay naging malaking salik ng ating pagpapakahulugan sa bagay-bagay na ito, lalo pa at itinuturing itong maselan at minsan pa nga ay makasalanan umano. Pero gaya na rin ng sabi ni Freud, walang taong isandaang porsiyentong normal. At kung ang libido man ang pinakamalakas na urge sa buhay ng mga tao, anong mangyayari kung ito ay labis na pinigilan? Dahil kung ang sabi nila, para maging normal ang isang tao ay kailangan niyang humanap ng ‘malalabasan.’ Sabi ulit ni Freud, magiging malaki ang inklinasyon ng tao na maging relihiyoso o maging alagad ng sining. Subalit maaari rin namang magdulot ito sa pagkakadiskaril ng sekswalidad. Sa kabuuan, kailangan talaga natin ng kritikal at malawak na pag-unawa sa lahat ng ito. 

Fourth Meeting - Reaction Paper

Biolohikal at Teorya ni Engels Pa Lang Iyan, Kaytaba na ng Aking Kaalaman!

                        Inilaan namin ang araw na ito para sa mga nakatalagang iuulat ng bawat grupo ukol sa biological differences ng  mga babae at lalaki. Tinalakay ng unang grupo ang chromosomal differences   kung saan sa ating mga genes pa nga lang ay makikita na ang ating mga pagkakaiba. Isang tipikal na halimbawa nito ay ang pagkakaroon ng dalawang pares ng 'x chromosomes' ng mga babae o XX na genes, samantalang XY naman sa mga kalalakihan. Nakatutuwang isipin na gumamit pa ng powerpoint  presentation ang grupo at maganda naman ang kanilang slides dahil nakabuod na ang mga mahahalagang impormasyon (ngunit hindi ko alam kung sinong miyembro at anong grupo ba talaga ang nagdala noong projector sapagkat ginamit rin ito ng ika-limang grupo). Dahil sa maayos naman ang kanilang pag-uulat ay 1.25 ang grado ko sa kanila.

                        Sunod namang tinalakay ng ikalawang pangkat ang ating genital differences at siyempre hayag naman na kung ano ang itsura ng kasangkapang kasarian ng mga lalaki at babae. Ang grupong ito ay gumamit ng mga debuho na iginuhit ng isa sa kanilang mga miyembro kaya ang ibibigay kung grado sa kanila ay 1.25.

                        Ikatlong paksa ay ang glandular differences naman at dito ay isa sa mga tumatak sa akin ay tungkol sa ating mga gonads kung saan sa umpisa talaga ay babae ito at matapos pa lang ng ilang mga proseso ay tsaka ito magbabago at magiging lalaki o mananatiling babae. Ibig sabihin lang nito, lahat ng tao ay nag-umpisa sa pagiging babae, well, biologically speaking naman.  Gumawa pa ang grupong ito ng tsart ng sinasabi kong proseso kanina sa isang manila paper kaya bibigyan ko sila ng 1.25 dahil nakita ko naman ang kanilang pagsisikap na galingan ang kanilang pag-uulat.

                        Ang aming grupo naman ay tumalakay sa internal differences at sa totoo lamang ay nahirapan at naguluhan talaga kami kung ano pa nga ba ang aming maaaring talakayin sa kadahilanang ang mga naunang pangkat ay natalakay na ito. Mabuti na lamang ay may ilang mga bagay silang hindi nabanggti at iyon na lamang ang aming idinagdag sa aming pag-uulat.

                        External differences naman ang tinalakay ng huling grupo at sila ay gumamit din ng projector kung saan sila ay nagpakita ng mga larawan upang ipakita ang pisikal na pagkakaiba ng mga babae at lalaki. Dahil talagang pinaghandaan nila ang kanilang paksa, bibigyan ko sila ng  gradong uno.

                        Matapos ang lahat ng pag-uulat ng mga grupo ay ipinaliwanag naman ni Prop. Fernandez ang teorya ni Friedrich Engels ukol sa The Origin of the Family, Private Property and the State. Dito ay hinati niya sa iba't ibang panahon ang kasaysayan ng mundo, kung saan ang unang yugto umano ay primitibo. Sa panahong ito raw ay matriarkal pa ang sistemang umiiral at tila kawawa raw ang mga kalalaihan. Bakit? Ito ay dahil daw sa isang babaeng dyosa ang nagtatago ng apoy, at maaari ring makipag-siping sa kahit na sinong lalaki ang mga babae. Kaya sa oras na magkaanak ang isang babae, walang magawa ang lalaki kundi maniwala na anak niya ang bata dahil wala naman siyang ibang makuhang patunay. Subalit ang mga babae naman ay alam sa kanilang mga sarili kung sino talaga ang kanilang anak sapagkat dumaan ito sa kanilang sinapupunan.

                        Hindi pa namin tapos na talakayin ang teoryang ito ni Engels subalit ngayon pa lang ay tila nahuhumaling na ako sa teoryang ito. Mahirap mang paniwalaan at tila nakasisira ito ng iyong paniniwala sa iyong relihiyon ay nakatataba naman ito ng malawak na isipan at kaalaman. Talaga nga naman palang napaka-kumplikadong usapin ang pagkakaiba ng kababaihan at kalalakihan, mapa-anong aspeto man yan.

Third Meeting - Reaction Paper

 - Pahayagan, Tawanan at Alaala ng Kabataan, Sa Pan Pil 19 Lang ‘Yan! -

    Alinsunod sa napag-usapan noong nakaraang pagtitipon, ibinahagi namin sa klase ang aming takdang-aralin - mga artikulo o propaganda mula sa pahayagan na kakakitaan ng lantad  o kubli mang indikasyon ng epekto ng patriarkal na sistema na umiiral sa ating lipunan. Halimbawa nito ay ang patalastas ng isang tatak ng sasakyan kung saan ay may makinis na binti ng isang babae ang nakalantad. Dito ay mawawari nating ginagamit ang mapang-akit na kagandahan ng mga kababaihan upang makahatak ng pansin ang naturang uri ng sasakyan. Tila sinasabi nito sa atin na mga lalaki lamang ang madalas o may kakayanang bumili ng sasakyan o sa ibang salita ay ang sasakyan ay gamit panlalaki lang, samantalang ang mga kababaihan ay hanggang object of desire na lang ang papel sa lipunan.

                    Nabanggit din ang isyu ng female circumcision sa Sudan kung saan kahit na ito ay ipinagbawal na ng batas ay pinipili pa rin ng ibang kababaihan na gawin ito dala na rin ng impluwensiya ng kanilang nakagawiang kultura. Sapagkat hindi sila aasawahin ng isang lalaki kapag hindi sila sumailalim sa tradisyon na ito. Kaya talaga namang masasabi natin na kung minsan, ang sarili nating mga kultura ang siyang naghuhubog sa atin na maging malupit sa ating kapwa, sa halip na maging rasyonal, dahil sa halip na sumabay tayo sa depinisyon natin ng pagiging makatao sa modernong panahon, ay nanatili tayong nakakulong sa lupon ng mga batas at etikong napag-iwanan na ng kahapon.

          Sunod naman nito ay ang pagbabahagi ng mga green jokes na gawang Pinoy kung saan nakapaghahatid din naman ng katuwaan, siguraduhin lamang na bukas ang iyong pag-iisip sa mga ganitong bagay at itatak sa isipang mga biro lang iyan.   

          Matapos niyan ay ang masasabi kong highlight ng bawat pagtitipon namin, ang pagbabahagi ni Ma’am ng kanyang mga naging karanasan. Labis talaga akong nakaka-relate sa mga kuwento niyang pakikipag-kumpetensiya sa mga kalaro niyang lalaki noong siya’s bata pa. Ilan sa mga ito ay ang pataasan ng ihi (kung saan dito siya unang nagtaka sa pagkakaiba nating mga babae at lalaki) at ang pagpatay ng apoy gamit ang ihi!

          Hindi man eksaktong parehas kami ng pinaggagawa noong ako’y bata pa man din, aaminin kong dahil isa akong batang kalye, ang mga naging karanasan ko rin noon tulad ng rambulan, karerahan, bunong braso at marami pang ibang weirdo at kinukunsederang hindi dapat gawain ng isang babae at ang pakikipaglaban sa mga lalaki ay umukit sa ‘kin ng malaking impresyon na para pala mapabilang ka sa loob, sa katanggap-tanggap na mamamayan ng isang lipunan, kinakailangan mong pumasa sa batayan nila ng isang pagiging tunay  na babae o lalaki. Dahil kung hindi, kukundenahin ka. Kaya iniidolo ko talaga ang mga taong nagawang buwagin ang sistemang ito at masayang namuhay at nagtagumpay sa mga naisin nila sa buhay.  

Second Meeting - Reaction Paper

 - Maligayang Pagdating sa Mundo ng Pan Pil 19! -

                               Noong Martes ang ikalawa pa lang naming pagtitipon para sa Pan Pil 19 kung saan tinatalakay ang kasarian at  seksuwalidad sa pamamagitan ng panitikan ng Pilipinas, mula noong bago pa man dumating ang mga Kastila hanggang sa kasalukuyan.  Dahil sa noong unang pagtitipon ay iginugol lamang namin ang buong klase para sa pagpapakilala at munting pasulyap sa Pan Pil 19, pinalawak pa ng aming propesor ang introduksiyon niya para sa kursong ito.   

                        Unang natalakay ay ang eupemismo o ang pagpapalit ng salitang mas magandang pakinggan kaysa sa salitang masyadong matalim, bulgar, o bastos na tuwirang nakapananakit ng damdamin o hindi maganda sa pandinig.  Ilang halimbawa nito ay bulaklak para sa ari ng babae o puke, at hinaharap naman para sa dede ng kababaihan. Mapapansin umanong ang eupemismo ay parte na ng buhay nating mga Pilipino, isang nakagawiang pagbibigay ngalan sa mga maselang bagay dala na rin ng ating kultura at konserbatibong pananaw bilang mga Katoliko.

                    Sunod naman ay napunta ang talakayan sa katanungang – Bakit nagkaka-conflict sa lipunan? Isang tanong na kayhirap sagutin sapagkat tila napakalawak ng kasagutang maaaring ibigay at kapag binanggit mo ang salitang lipunan ay maraming aspeto itong maaaring pagtuunan. Ilan sa mga nabanggit na dahilan ay ang pagkakaroon natin ng iba't ibang pananaw at gustong mangyari sa buhay. At papasok din dito ang kaugaliang akonomics kung saan ayon nga kay Prop. Fernandez ay laging sariling kapakanan lamang ang iniisip nating mga Pilipino at hindi ang kolektibang kaunlaran na matatamo natin sa bawat desisyong gagawin.     

     

                        Huling naging paksa namin ay ang patriarchal system na umiiral hindi lang sa bansa natin, bagkus ay sa buong mundo man. Nabanggit din na kung pakakasuriin ang kwento sa aklat ng Genesis sa banal na bibliya ng mga Katoliko, ang kwento ng paglikha ng mga unang tao na sina Eba at Adan, pati na rin ang ititnuturing na original sin  nating mga tao, ay kakakitaan ng hindi balanseng pagtingin at kapangyarihan (o karapatan) ng mga babae at lalaki sa ating lipunan. Subalit naging malaking katanungan rito ay sa paglipas ng panahon, ang mga kalalakihan nga lang ba ang dapat na sisihin sa patriarkong sistema na umiiral sa atin? Masakit mang isipin, tayong mga kababaihan ay responsable rin sa pag-iral ng sistemang ito. Buti na lamang ay namulat na ang karamihan at kumikilos na upang unti-unting buwagin ito, katulad na lamang ng sinabi ng aming propesor na pagdalo niya sa Beijing, China kasama ang mahigit 350,000 pang kababaihan mula sa iba't ibang parte ng mundo, para pagtibayin ang ilang mga plataporma para sa ating mga karapatan.

                        Sa naging kabuuan ng aming talakayan noong Martes, kasabay ng nakakatuwang pagbabahagi ng aming propesor ng kanyang mga nakaka-inspire at kuwelang karanasan, nakalulugod isiping nabigyan ako ng tsansa ng CRS na makuha ang kursong Pan Pil 19. Karapat-dapat nga ang pagiging in-demand nito dahil na rin sa natatangi nitong paksang nais palalimin ang ating mga kaalaman at pag-unawa sa usaping kasarian at seksuwalidad, lalo pa at ang ating bansa'y itinuturing itong maselang usapin.

                        At bilang isang kabataan, at isang babae na rin, masasabi kong malaki nag maitutulong ng kursong ito para sa paghubog ng ating kamalayan. Dahil sa mga napag-usapang pa lang na iyan, alam kong pahapyaw pa lang ito sa kung ano ba talaga ang estado ng kamalayan nating mga Pilipino, naming mga kababaihan. Kaya naman labis na akong nagagalak at nasasabik sa kung ano pa nga ba ang hindi ko alam, hindi ko pansin at ano nga ba ang mga misteryong pilit na itinatago ng sistema at kultura natin sa akin. Nawa'y maging lubos nga ang aking ligaya sa pagpasok ko sa mundo ng Pan Pil 19!